اذا كنت تريد الاشتراك فى خدمه الانترنت المنزلي من شركة المصريه للاتصالات او اي شركة مثل فودافون,اتصالات,اورنج الخ... فانت لازم تقدم على خط ارضي فى الاول,وهنشرح فى المقال خطوات التقديم فى خط ارضي للنت و كمان الاشتراك فى خدمه الانترنت , والاوراق المطلوبة للحصول علي الخدمه وايضاً التكاليف تقريباً لعمليه التقديم كلها ارضي ونت.
كمان هنوضح بسرعه الباقات المتاحه حالياً واللى ممكن تتغير من فتره للثانية ولكن هنسيب رابط الموقع لمتابعه آخر الباقات المتاحه,وازاي تخلي الخط الارضي الخاص بيك للنت فقط "استقبال" و اي هيا التكلفه.
شرح خطوات تركيب خط ارضي جديد ونت.
اول حاجه هنكلم عليها هيا المستندات المطلوبه منك للتقديم علشان متروحش الفرع وترجع تاني,وبعدين هنكلم على مرحله التقديم والخيارات الموجوده ليك, وفى الاخر هنذكر التكلفة اجمالاً لتوصيل خط ارضي ونت,اقرأ الفقرات كلها وهتعرف كل اللى انت محتاج تعرفه علشان تقدم بكل سهولة.
1- الاوراق المطلوبة للتقديم على خط ارضي ونت.
مطلوب منك تجهيز عقد ايجار للشقه اللى انت ساكن فيها, وفي بعض الفروع كانت بتشترط ان يكون عقد الايجار تكون مدته اكثر من 6 شهور,وحالياً انت بتكتب على اخر العقد ان العقد على مسئوليتك انتا علشان الشركه تخلي مسؤليتها القانونيه ودا شىء عادي و موضوع توفير عقد الايجار سهل جداً.
اذا كنت ساكن فى بيت عيله مثلاً او بيت والدك,تقدر تعمل عقد ايجار من والدك عادي وتخلي مدته سنتين او ثلاثه اياً كان , لو البيت باسمك ممكن تاخد وصل مايه ووصل نور طالما العداد باسمك وانتا مالك البيت.
طبعاً لازم يكون معاك البطاقه الخاصه بيك , ويفضل انك تصورها صورتين قبل ما تروح اي فرع, فكدا لازم يكون معاك عقد الايجار + صورتين من بطاقتك الشخصيه.
دلوقتي هتروح لاقرب فرع للمصريه للاتصالات,علشان لازم تقدم فى خط ارضي اياً كان عايز تشترك مع شركه وي للانترنت او لا , ولكن انا هكمل الشرح بفرض انك هتشترك فى الانترنت والارضي وكل حاجه من شركة المصريه للاتصالات.
2- التقديم على خط تليفون أرضي للنت فقط.
عن طريق اقرب فرع للمصريه للاتصالات بتدخل تقطع ورقه تعاقد جديد وتنتظر دورك,لما بيحي دورك بتروح للموظف وتطلب منو التعاقد على خط ارضي جديد ويفضل انك تصور اقرب كابينه حرارة او كوبس لبيتك,لتوفير وقت فى المعاينه والعثور على اقرب مكان ليك.
الكوبس او الكابينه اقصد بيها "البوكس اللى بيكون متعلق على البيوت وخارج منو سلوك حرارة كثيرة" بيكون مكتوب عليه رقم صور البوكس من برا ، هتملي استمارة التعاقد وتختار رقم الخط الارضي اللى انت عايزه وكدا انهيت مرحله الحصول على خط ارضي.
تكلفة اشتراك الخط الارضي 60 جنيه كل 3 شهور , واذا كنت هتعمل الخط استقبال للنت فقط فتكلفه الاستقبال 25 جنيه كل 3 شهور يعني مجموع فاتورة التليفون 85 جنية مصري.
3-التقديم على نت منزلي واي فاي.
انهيت التعاقد علي خط ارضي, تقدر فى نفس اليوم تشترك فى خدمه الانترنت عشان متروحش مرة ثانيه للفرع,الموظف بيشترك ليك فى الانترنت وبيعرض عليك الباقات المتاحه, وتقدر تشوف باقات النت من هنا.
في حاله انك هتشترك على اول باقة اللى هيا بتكون 140 جيجا وسرعتها بتصل الى 30 ميجابت على الثانيه على حسب قدره تحمل الخط الارضي الخاص بك اللى تقدر تعرفها من خلال الفرع او خدمه العملاء,تكلفة الباقة 120 جنية مصري بدون الضرايب.
سعر الباقة الحقيقي فى الفاتورة بيكون حوالي 140 جنيه مصري , والان بننتقل الى موضوع الراوتر وبتحصل على راوتر السرعات الجديد VDSL وبيتم تقسيط تمنه بمعدل: 5 جنيه كل شهر او 6 جنيه تقريباً, بيتم اضافتهم على فاتورة النت شهرياً.
ملاحظة: الشركة أوقفت نظام تقسيط الراوتر حتى اشعار اخر ، لذا عند التقديم يجب شراء الراوتر ودفع سعره كاملاً او يمكن شراء راوتر ارخص من الخارج ويبلغ سعر الراوتر: 600 جنيه وقد يختلف على حسب الإصدار ويمكنك معرفة اسعار الاجهزة عبر الرابط التالي: راوتر We.
بتستلم الراوتر من خلال الفرع ولكن مش فى نفس اليوم, بعد تفعيل خدمه النت للخط الارضي الخاص بيك بيوصلك رساله على موبايلك,وبتروح تستلم الراوتر من الفرع ، وبتركبه فى الخط الارضي والنت بيشتغل.
الراوتر الجديد مش محتاج منك اي اعدادات,ركب سلك الخط الارضي فى المكان المخصص ليك فى الراوتر,والراوتر هيتم ضبط اعداداته تلقائياً وهتلاقي الرقم السري للراوتر مكتوب على ظهر الراوتر للدخول الى شبكة الواي فاي.
4- سعر تركيب خط ارضي و الراوتر نت.
الرسوم او التكلفة الاجماليه للاشتراك فى خط ارضي وتفعيل خدمه الانترنت وكمان الحصول على راوتر السرعات الجديده VDSL, بتتراوح من 400 الى حد اقصي 500 جنيه فى اول مره وهي مرحله التعاقد فقط ، في حال الغاء نظام تقسيط الراوتر سيضاف على المبلغ ثمن الجهاز.
وبعد مرحله التعاقد بتكون الفواتير المستحقه عليك كالتالي:
- فاتورة الانترنت بتدفع شهرياً >> 145 جنيه تقريبا + بالاضافى لـ 6 جنيه قسط الراوتر
- فاتورة الخط الارضي بتدفع كل 3 شهور>> 60 جنيه اشتراك + 25 جنيه استقبال.
وكدا نكون غغطينا كل الاسئله والاستفسارات الخاصه بالتعاقد على خط ارضي جديد وتفعيل خدمه الانترنت وايضاً الاوراق المطلوبة ومراحل التقديم, راجع شرح تغير كلمة مرور شبكة الواي فاي,حماية الراوتر من الاختراق.. تابع القائمة البريديه للمزيد من الشروحات.
